Didika ba Borga (HAKILAR ho Lian Makas)

 

HAKILAR ho Lian Makas

 

Borga … Borga da Costa
Hakruuk, hamtauk tane Ó aas
 
Hakruuk ba Ó hau HEROI
Hakruuk ba Ó hau AMAN
Hakruuk ba Ó hau MAUN
Hakruuk ba Ó hau RAN-MALUK
 
Ho dadolin Ó muda
Ho dadolin Ó fanun timor oan
Ho dadolin Ó fo esperansa
Ho Ó dadolin UKUN RASIK AAN
 
Loron ohin
Loron aban
Loron-loron
Aban bainrua
La mukit, la sai tan atan
 
Ó hanorin ami, ó nia dadolin sira
Hanorin ona ami hakilar makas
HAKILAR ho lian makas tebes
“LA SAI TAN ATAN”
 
Dadolin murak
Dadolin matak malirin
Dadolin kore bobar
Dadolin ukun rasik an
 
Borga… Borga… da Costa
Hakruk, hamtauk, tane Ó aas
Hamtauk ami hakneak
Hamtauk ami nonok
Hamtauk iha minute ida ami nia nonok
Ba Ó ami HEROI

 

Cristovão PEREIRA (Likuliku)
Bali, 14/10/2019

 

Puzia ne, didika ba Poeta Fransisco Borga da Costa nia tinan moris 14 Outubru 1946, hodi fo Onra, nomos puizia ne hakerek hodi fo resposta ba, puizia Borga nian, ne’ebé kontra colonialista, ho mesagem katak “LASAI TAN ATAN”. Liafuan sira iha dadolin ne, ispirasaun mai husi Borga da Costa nian puisia.

CACUSA O sei la nahas

CACUSA O sei la nahas

Cristovão & Luis

 

CACUSA

Bolu ... ami bolu fo lisensa ami bolu.

HUSI LETEN AASWAIN, MATEBIAN UMA NO AHI,

Rai ulun, rai ikun mai rai husar, LULIK RAI LULIK

Mai Rai hotu rai-rai, rai okos rai leten, mai nakukun, mai o naroman.

 

Hakat besik mai, tur iha biti KAMANASA BORO LIURAI

SURIK, morten kaibauk belak no mamafatin

Simu ami look, simu mama ba, laos mutin, laos mean

Ne mak ami karan, bua no malus, ahu no tabaku.

 

CACUSA

Husi ó kledik fatin, rai o horik ba

Tutur ona ILAS MAROMAK OAN

Oan mane maksoin hiit aan sae

sae ba haksumik iha aman sorin.

 

CACUSA...! CACUSA...! CACUSA...!

Ó a`as wain,.. ó  sei la nahas,..ó Rai FATIN SANTO

Ó mak ami nia SASIRIN.

 

CACUSA

Kukur husi tambor, karaudikur, babadok

Knananuk, knanoik, bidu no tebe

Husu ó Kutan, husu ó fú, husi bua no malus

MATAK MALIRIN hodi kore namkore, fukun no bobar

 

CACUSA

Dader raihun mutin, molok mahowen maran

Berliku baku ikun, roman loron hiit an sae

Husi ó lidun liir Kitutu Mota-ain,

Husi ó sorin hateke Bidau Manumata

Husi fehan hetan camea remlala

Hateke ba ó kwana hetan tasi ilin sira, Atauru, Weter, Dalahitu

 

CACUSA

Wainhira loro hiit nia aan sae,

To fali loro haluut nia aan

Fatuk, dut, ai, ho balada sira, hahi hanai

To fali iha kalan, fitun no fulan nabilan fo naroman

Rai, we, tasi, anin, udan, kalohan, haksolok hawelok

 

CACUSA

Iha ó tutun hetan kbiit, fahe buras

Temi ó naran nakonu ho kmanek,

Hare ó lalatak, hafalun kmahan

 

CACUSA...! CACUSA...! CACUSA...!

Ó a`as wain,.. Ó sei la nahas,..Ó Rai FATIN SANTO

Ó mak ami nia SASIRIN

 

(Lidun Camea, 20-03-2023)

Cristovão P & Luis 

Lisan, Hun no Kultura

Lisan, Hun no Kultura

 
Tan ó iha sidade, ó nega sira,
Tan ó iha osan, la besik sira,
Tan ó iha kareta, ó la presiza sira,
Tan ó iha uma di’ak, ó despreza sira.
 
Hamtauk Adora, ó nia Maromak,
Hakruk Respeita, ó nia Uma no Ahi,
Hakneak Bensa, ó nia Tiu Abon sira,
Ho Lisan no kultura, o iha klamar.
 
Labele monu, ba veneno sidade,
Labele matan kan, ba sasan nia babeur,
Labele hakribi, tan sira foho ka foer,
Lisan ida, kultura ida, mai husi raan ida.
 
Maibé;
Se ó haluha tia, ó nia hun,
Sidade, nia veneno sei hatohar ó,
Osan, sei hasai ó nia dignidade,
Kareta, sei lahalo ó lao livre,
Uma Luxu, sei nakfera fo fukun.
 
Wainhira laiha solusaun;
Ó ba tanis iha Tiun abon sira, mak o nega,
Husu dikulpa ba avo sira ne’ebé, ó haluha,
Husu perdaun ba ó nia kultura, ne’ebé ó hakribi,
"Ha’u sala, hakruk, husu kuta, fú matak malirin".
 
Ó husi, rai inur Lafaek,
Ó iha lisan, no kultura,
Ó iha hun ida, abut ida,
Ó mak Timor oan, lolos.
 
Wainhira, Maromak fo prova ó,
Hakfodak, husu ba ó NAI, ó Lisan,
Husu uma ahi, atu fo dalan foun,
Hakruk ba uma ahi, la’os nostalgia,
Wainhira laiha uma ahi, ó sei namlaik.
 
Lisan no Kultura, haforsa Domin,
Lisan no Kultura, habiit Damen,
Lisan no Kultura, hahi Unidade,
Lisan no Kultura, haburas Familia,
Lisan no Kultura, hamtauk Malu.
 
Kuidadu: 
Lisan no Kultura, 
Labele uja ba iminian interesse, 
Labela pratika explora malu,
Labele halo ema sai kik no kiak,
Lisan no Kultura, hamtauk Malu.
 
Cristovão PEREIRA (Likuliku)
Colacomahato, 04/04/2014

12 Novembru 91

12 Novembru 91
Foin sa’e otas nurak, la hakiduk, la’o hasoru.

Hakrobuk husi Motael, ba Santa Cruz,
Hananu knanoik, mananuk berliku,
Hafanun otas nurak, foin sae loriku,
Husi mahowen nia turuk, ami laoliku, 
Hakbiit husi kuta, bua malus tabaku.

Loriku otas nurak, beran ida, lao ba oin,
Maske o Hasobu!.
Loriku otas nurak, aten barani, ran mean,
Maske o Hapara!.
Loriku otas nurak, ran nakali, ran manas,
Maske o Hatenu!.
Loriku otas nurak, butuk hamutuk, raikuak ida,
Maske o Hamout!.

Hakbesik ba besik, pilatus no diablo,
Husi sorin ba sorin, soldadu 303,
Hakat ba oin, botas kilat baioneta,
Hasoru besi meik, hanesan udan rihik.

Foin sa’e otas nurak, la hakiduk, la’o hasoru!

Husi nia tarutu, monu la tarutu,
Hametin ain fatin, tuba nafatin,
Hakanek nabutuk, isin nia butuk,
Husi ran nian fakar, mate nia lekar.

Foin sa’e otas nurak, la hakiduk, la’o hasoru!

Kroat sona borus, hafitar isin lolon,
Kumuliman nafatin, se hirus matan,
Knananuk kokorek, husi raiikun raiulun,
Kokorek nafatin, to loro hiit nia aan.

Foin sa’e otas nurak, la hakiduk, la’o hasoru!

BA Santa Cruz, hakrobuk husi Motael,
BA Rai Lulik Lalatak Lafaek,
BA OAN TIMOR NINIAN,
BA UKUN A’AN RASIK.//

Cristovão PEREIRA. (Takamatan)
Camea, 21 de Novembru 1991