KAIXA MALE-MALE, nafatin firmi, nafatin ida deit
Hiit Aan mai, Aman Funu Nain
Handi iha nobun, kledik ne
Kledik husi KAIXA MALE-MALE
Hamoris ahi klunu, revolusaun
Hasoru kolonialista hahalok babeur nian.
Komandante Kayrala Xanana
Rai no loro sasin ba Funu
Ran naksulin, sai kadalak oan
KAIXA MALE-MALE, sobu maksatan sira
Hamutuk ita farsa ida, hakat ba Vitoria.
Ohin loron lulik, loron murak ba KAIXA MALE-MALE
Ohin iha ita leet, Asuain funu nain Kayrala Xanana
Ohin sei funu nafatin halakon malisan no hahalok at sira
Ohin KAIXA MALE-MALE, nafatin firmi, nafatin ida deit
Ami agradese, ami respeitu, hein ordem, hein tatuduk.
Ohin Komandante em chefe, mai inagura ita kledik fatin
Male-male la namlele, Male-male la naksobu, Male-male forte
Husi matebian knua laherubi, uma no ahi, rai tasi, we fatuk ai
Maske hasoru tutunmeik, asu siak, laloran no anin shut husi tasibalu
Male-male la namlele, Male-male la naksobu, Male-male forte disididu.
Fo Lisensa ami bolu, Bolu ami bolu,
Mai ó Fitun, mai ó loron, Fanun ba ó Rai,
Mai ó tetuk, mai ó as, husi badak, husi okos,
Husi mama nia mean, MALE-MALE la sura kolen,
To'o aban bainrua, MALE-MALE sei hamriik metin.
Komandante em chefe FALINTIL, Kayrala Xanana
Riska hela letra lulik ba plaka MALE-MALE
Hodi fo onra ba funu, fo onra ba matebian
Omenajen ba funu nain, mak sofre violensia, turtura
Ba mos sira mak isin no ruin, buka lahetan, rate laiha.
Maske ami hatene, ami sai iska ba kolonialista sira,
Husi Vila ba knua to ailaran MALE-MALE determinado
Maske hakat entre Kroat no meik, MALE-MALE a’as wain
Prontu asume konsekuensia oinoin, MALE-MALE lahakiduk
Ba rai LALATAK LAFAEK, BA UKUN AAN RASIK TIMOROAN NIAN.
Kaixa Male-Male, lulik iha mémoria
Forte iha istória, haburas nia vitoria
Ba liberdade, unidade, dignidade Timoran nian
Obrigadu A’as wain, Komandante em-Chefe
Viva Falintil!
Viva Kayrala Xanana!
Viva Kaixa Male-Male!
Viva Timor-Leste!
Baucau, DILI, 18/10/2025
Cristovåo P & Antonio de Sa Ximenes
Puisia ne hakerek ba Kiaxa Malemale iha Baucau, hodi simu komandante em Chefe Falintil Kayrala Xanana, ba asina plaka kaixa Malemale, iha dia 19/10/2025. Deklama puisia ne Antonio iha seremonia asina plaka ne iha baucau.