Forai Musan Ida

Forai Musan Ida

Mama... Ó iha ne'ebé?
Forai musan, ai-musan ki’ik
Istória ne’ebé semo, husi leet
Halo matawen, turuk lapara
Ó husik uma mamuk, rai nakukun.

Ha’u nia ain ki’ik, susar atu la’o
Hau nia liman kiik, seidauk kaer metin
Hanoin Ó liman ne’ebé, sepre fó hán hau
Ha’u la rona tia ó lian, avo dehan ó sei toba
Hau ba mama nia toba fatin, hakarak hare mama.

Mama... Ó iha ne'ebé?
Hau hamlaha ona, hau sente hamrok
Avó-feto, mak sempre iha hau sorin
Truka mama nia fatin, ne’ebé husik hela
Mama, fuan ne tristi, mama bá ladehan hau.

Iha kalan, wainhira matan ne dukur
Teki-teki rona Ó lian, besik mai ha’u
Bainhira hau loke matan, rai ne mamuk
Avó dehan "Ó toba ona", aban mama mai fali
Ho deit aifunan ida, hase mama iha hau nia hader.

Mama Ó iha dook, hanesan fitun dook iha kalohan
Liman lolo husu Ó, atu kous no hadomin netik hau
Dalaruma ho aifunan, hau liu husi o taba fatin
Hakarak ba kaer ba Ó liman, maibé mamuklos
Mama tula netik liman mai, maibe o nonok hela.

Mama... Ó iha ne'ebé?
Toba hakmatek ba, hamutuk ho Anjo no Santo
Ó mak hau-nia is moris ba, hau nia respirasaun
Ó mak ahiknuluk, sempre fo lakan hau nia dalan
Mama hau hadomi Ó.. Mama… hau hadomi Ó..



Cristo P (Likuliku)
Dili, 20/02/2010

Dadolin ne inspira husi istoria mak roan husi ibun ba ibun.