Pensaun Vitalísia

Pensaun Vitalísia

 

Pensaun Vitalísia!
Nia tur sadere iha kadeira poder nian,
Enkuantu nia hakilar tun sae ba povo,
Katak “ami servisu ba nasaun!”.
 
Pensaun Vitalísia!
Susu rai bokur, povo nia isin bokur,
Kabun bosu nakonu ho povu nia ran,
Nia hamnasa kroat hanesan surik tutun.
 
Pensaun Vitalísia!
Nia la’o dólar hanesan samea metan,
Ninia nanál sanak, promessa rihun rahun,
Ninia liafuan midar, nakfilak ba veneno.
 
Ospitál aimoruk la iha, eskola la iha livru,
Traktor at, ikan lakon, Pensaun Vitalísia sai bokur,
Povu kuda governu sosa, nudar slogam deit,
Pensaun Vitalisia, halo rasik Lei ba nia aan rasik.
 
Ó Rai Timor! Ó Rai lalatak Lafaek!
Ó Maubere oan! Ó povu ki’ik no mukit
Pensaun nia la hamoris Ó nia moris,
Maibé marka hela fitar, halo Ó ran turuk lahotu.
 
Matebian uma ahi, lulik rai lulik, Loro no Rai,
Rona hela ba, ami halerik husi dadolin ida ne,
Ami intrega Pensaun Vitalisia ba imi liman,
Ami ema laek, ami folin laek, tetu hela ba.
Nai, Sekarik dadolin ne lalós, Perdua ami ba.
 
 
Cristo P (takamatan)
Dili, 4 Maiu 2009