"HAU LA’OS Ó NIA KARAU”

 

"HAU LA’OS Ó NIA KARAU”

 

 
Hú husi anin, lian semo dok 
Halerik ida husi forsa laek
Hafeto, tuku, tebe, baku
Ho hakilar dehan "ne’e hau nia karau!"
Ho lian nakfilak hanesan anin.

 
Ho ida ne’ebé ami moris hamutuk
Husi juramentu lulik Nai nia oin
Hadomi la soe malu to mate
Hakotu, namkore, lahuk namkari
Hadomi ne’e sai nakrekas.

 

Laloran tasi, nakdedar iha fatin
Lalehan no rai sai nakukun
La sente, anin ida hú mai
Lian ida tama mai hau tilun
“Ó NIA FOLIN SELU TIA ONA”.
 

Hodi Ó nia osan hanehan Hau
Hodi Ó nia kuda, hata’uk Hau
Hodi Ó nia sasan haksi’ak Hau
Hodi Ó nia forsa hakanek Hau
Hodi Ó nia hahalok haterus Hau.

Sente tarutu, mai husi liman, no ain
Sofre haré hau nia oan sira trauma
Sira tanis wainhira hau tanis
Sira barak rona no hare, dehan
Sira sorin dehan, ne bikan ho kanuru deit.

Ó halo hela, “explorasaun”
Ó hanoin laos, “traisaun”
Ó kontente ho “dominasaun”
Ó la sente ne “presegisaun”
Ó dehan ó nia "tradisaun"
Ó lahatene ne’e "violasaun!".

 

Hau halerik, haforsa hau aan
Hanesan udan rahun ho lun turuk
Hodi mura mura, lian moruk sai
"HAU LA’OS Ó NIA KARAU”
“HAU LA’OS Ó NIA ATAN!".

Hau Feto hau iha valor umanu
Hakilar ba ulun-na’in, no ema nasaun ne
Ho "RESPEITU MAK TRADISAUN DI'AK!"
Hamate ai-sukun, husi istória ba VITÓRIA
HAPARA! PARA! PARA!.
 

Cristovão PEREIRA (Likuliku)
Dili, 25/03/2010